السلام عليكم، فالجزء اللي فات شفنا كيفاش يمكن للذكاء الاصطناعي يخدمنا فمختلف المجالات و شرحت كيفاش كيتعامل مع TEXT، اليوم غانطرق لـ bots غانعرفو ما يسمى بـ context understanding ؟ و غانشوفو شنو الفرق بين البوت العادي و البوت اللي خدام بـ ai ؟
كيفما كتعرفو الذكاء الاصطناعي عندو دور مهم ف صناعة البوتات حيت كايخليهم يفهمو سياق الكلام يعني فاش كتسول ai bot على شي حاجة كايحاول يفهم context ،كايشدText ديالك كايرسلو للسرفر و كايدير text recognition اللي دويت عليها فالجزء اللي فات و كايحاول يشوف شنو هو أنسب رد و كايقوم بالرد. أما بالنسبة لـ regular bot كايخدم بالشكل التالي: فاش كتكتب ليه Text كايقوم باستخدام بعض الدوال اللي الدور ديالهم أنه يشوفو دوك الكلمات اللي كاينين ف Text واش كاينين عندو فقاعدة البيانات ولا لا، ايلا لقاهم كايرود بـ OK أو برسالة الرد اللي ديجا مكتوبة عندو فقاعدة البيانات.
باش نزيد نوضح كثر و يبان ليك الفرق غانعطيك مثال بسيط، تخيل أنك بغيتي تعرف الطقس د هاد النهار، او كاتسول على بعض الاحداث اللي غايقدرو يطراو اليوم. بالنسبة للبوت اللي فيه ai غاتحس براسك كادوي مع ش واحد ليك كايفهمك شنو كاتقول. و يقدر يعطيك أجوبة من عندو. أما بالنسبة للبوت اللي مافيهش ai غاتحس براسك كاتدوي مع واحد مكايفهمكش مزيان حيت هو كايرد غير عليك فحالة لقى دكشي اللي كتبتي ليه كاين فقاعدة البيانات و كيرد بجواب ديجا مكتوب فالنهار فاش كان كايتقاد. و هنا غاتكوم فهمتي شنو المقصود بـ context understanding و شنو الفرق بين ai bot و regular bot.
حاولت مانطولش هههه المهم هادشي راه بسيط غير نظري و كيفما قلت من قبل كندويو على الأساسيات باش ايلا شفنا شي advanced مانكونوش واحلين مع هادشي اللي بسيط او ماعندناش فكرة عليه..
إسماعيل فداوي ❤️